in

Malakas na nga ba si Maganda?

Malakas na nga ba si Maganda?

Malakas na nga ba si Maganda? Ito ay isang tula alay sa lahat ng mga Kababaihang patuloy na nagiging malakas dahil sa mga hamon sa kanyang karanasan at kakayahan.

Hango sa isang alamat ng bayan

Pilipinas na tanging sinilangan.

Sa aking pagkabata ay pinaniwalaan

Nabasa ko sa librong nahiram.

Mula sa nabiyak na puno ng kawayan

Iniluwal ang isang kagandahan

Kapiling ang may angking kakisigan

Si Malakas at si Maganda ay isinilang.

Daang taon ay nakalipas

Pagkaalipin sa iba ay dinanas

Ninais din nilang makaalpas

Magkaroon ng maayos na bukas.

Itong si Malakas naghanapbuhay

Si Maganda ay iniwan sa bahay

Sa pamilya ay buong inasahan

Taguri ay ilaw daw ng tahanan.

Ngunit isang araw ay natauhan

Pagiging palamuti ay kinalimutan

Inaral ang batas at karapatan

Kinalas ang tanikalang kinamulatan.

Hindi na siya magtatago

Hindi na magpapakabobo

Hindi na imamaltrato

Hindi na isang dungo.

Malakas na nga ba si Maganda?

Di na aasa sa bisig ng kasama

Sariling diwa ang magpapasiya

Buong kaluluwa ang ikakasa.

Malakas na nga ba si Maganda?

Wala nang takot sa puso niya

Kaya nang lumaban sa karahasan

Pagkaalipin at kabastusan.

Malakas na nga si Maganda

Hindi na kagaya noong una

Kariktan ay kinaligtaan

Katapangan na pinuhunan

DITTZ CENTENO-DE JESUS

Mga Rehiyon ng Italya, magbabago ng kulay simula March 8

Konsultasyon ukol sa Imigrasyon, hatid ng Migreat App – Stranieri in Italia