Isang pastol na galing sa kabundukan
Dumating sa aming magulong kawan
Nagturo ng mabuting balita’t kabutihan
Sa amin ay nagmulat sa katotohanan
Sa madilim na landas kami’y ginabayan
patungo sa inaasam na kaligtasan
Isang pastol na galing sa kabundukan
May angking karisma’t katalinuhan
Mapagpakumbaba, tapat at madaling lapitan
Sa aming kaguluha’y laging nagbibigay kaayusan
May dala-dalang inspirasyon at kapayapaan
Kami’y inilalayo sa mga kapahamakan
Isang pastol na galing sa kabundukan
May dalang mga kanta sa aming kawan
Mga ito’y naging aming sandigan
Nagpatibay sa pagkakaisa’t pagmamahalan
Nagsasabi na sa pagtatayo ng masayang pamayanan
Madali’t maayos ‘pag kay Kristo inilalaan
Isang pastol na galing sa kabundukan
May boses na buo’t puno ng katapatan
Sa pagbigkas ng mabuting balita’y naging kasangkapan
Kapag may bagyo’y kita ang katatagan
Takot, pagkabahala’t pagkalito’y hindi siya kakakitaan
Aming kawa’y minamahal at ‘di iniiwanan
Isang pastol na galing sa kabundukan
Tahimik,mapagmahal,matatag at maasahan
Kanyang baston ay katapatan at karunungan
Mahirap ma’y sa pag-ibig siya’y biniyayaan
Handang ipamahagi sa iba pang kawan
Mga salita niya’y parang galing sa kalangitan
Sa Diyos nagbuhat lahat ng kanyang mga katangian
(ni: Demetrio ‘Bong’ Rafanan)
