Unti-unting umuusad, unti-unting nalalapit
Pilipinas na bayan ko, unti-unting nag-iinit
Nag-iinit ang labanan, kandidato’y nagngangalit
Gumagawa ng paraan, upang boto ay makamit
Unti-unting umuusad, unti-unting nalalapit
Pilipinas na bayan ko, unti-unting nag-iinit
Nag-iinit ang labanan, kandidato’y nagngangalit
Gumagawa ng paraan, upang boto ay makamit
Dalawampu’t dalwang araw, ang araw na nalalabi
Ang araw na itinakda, sa pagpili ng mabuti
Pilipino’y naghihintay, pagsapit ng Mayo nueve
Sa balota’y isusulat, ang napiling presidente
Oh kapwa ko Pilipino, oh mahal kong kababayan
Tayo ngayo’y magka-isa, gamitin ang karapatan
Boto nati’y pagalawin, sa darating na halalan
Piliin ang kandidatong, hahawak sa ating bayan
Piliin at pag-aralan, ang tunay na pagkatao
Kasama ang plataporma, ng nasabing kandidato
Ito’y ating karapatan, pagkat ito’y ating boto
Huwag tayong padadala, sa udyok ng kahit sino
Ngunit habang may panahon, habang tayo’y may oras pa
Ating munang pag-aralan, ang kanilang plataporma
Lahat sila’y may pangako, pag sila ay nahalal na
Tayong mga mamayan, ang hahatol sa kanila
Kaya tayong Pilipino, mapalad ding masasabi
Pagkat tayo’y binigyan, ng karapatang pansarili
Kalayaang hawak natin, ito’y ating ipagbunyi
Ito’y ating alagaan, sa kapwa’y ibahagi
Ang bukas ng ating anak, nasa ating mga palad
Hawak natin sa ‘ting kamay, ang lapis na ipanunulat
Ang desisyo’y nasa atin, sa loob ng ating utak
Sa isip at sa ‘ting puso, suriin ang nararapat
Lima (5) silang kandidatong, pwede nating pagpilian
Si Mar Roxas at si Grace Poe, si Duterte at si Miriam
Si Binay ba’y inyo pa ring, isasama sa listahan?
Kung Oo ang inyong sagot, inyo munang pag-isipan
Mahal naming PANGINOON, ang bahala ay IKAW na
Kung sino ang nararapat, IKAW na po ang magpasya
Hawakan mo ang kamay kong, magsusulat sa balota
Pagkat itong aking lakas, ay kulang din kung wala KA
ni: Letty M. Manalo
