LARAWAN NI INAY

alt

 

 

 

 

 

 

 

 

 

 

 

Larawan ni Inay aking pinagmamasdan

halata na sa  kanya ang katandaan

ngunit sa kanyang mukha’y aking nababanaagan

ngiting matamis na siyang katunayan

sa kanyang nakikita ay naliligayahan

kaming kanyang mga anak na nagsilakihan

 

Larawan ni Inay akin paring pinagmamasdan

pilit iniisip at binabalikan ang nakaraan

masasayang araw sa kaniyang kandungan

kaniyang pag-aaruga’y ‘di matatawaran

kaniyang pagmamahal ay lagi ng nandiyan

walang kapantay at walang kamatayan

 

Larawan ni Inay akin paring tangan-tangan

aking naaalala ang kanyang kabutihan

lalo na pag ako’y nadadapa at nasasaktan

agad niya akong binabangon at dinadamayan

lagi na sa ‘king tabi at hindi na ako iniiwanan

hanga’t ako’y madala sa aking higahan

 

Larawan ni Inay akin ng hinahalikan

mga mata ko na ay luhaan

muli naming pagkikita’y kinasasabikan

para siya ay aking mapasalamatan,

upang kamay at noo niya’y mahalikan

na siya’y aking mahal ay ipagsisigawan

(NI: BONG RAFANAN)