Friday, Oct 31st

Last update07:05:27 PM GMT

MGA DAPAT MALAMAN TUNGKOL SA PAP SMEAR O PAPANICOLAOU TEST

  • PDF

altAng Pap Test ay para sa mga babae at ginagawa upang malaman ang kondisyon ng iyong cervix (puerta ng matris). Ang Pap Test ay isang madali at magaang pagsusuri gamit ang cotton swab upang siyasatin kung mayroong mga di-pangkaraniwang pagbabago sa selula ng matris sa pamamagitan ng mikroskopyo. Kung ang mga pagbabagong ito ay makita at makontrol ng mas maaga, maaaring maiwasan ang higit sa 90 porsiyento ng pinakapangkaraniwang kanser sa matris.

Ang Pap Test ay bahagi ng pag-iingat sa kalusugan. Maaaring magka-kanser sa iyong cervix at maaaring abutin ng ilang taon ang pagdevelop nito. Nag-uumpisa ang kanser sa mga maliliit na pagbabago. Maagang nahahanap ng regular na Pap Test ang mga nakakasamang pagbabago at maaaring gamutin ang mga pagbabagong ito.

Ang pinakatamang panahon para sa Pap Test ay kapag hindi ninyo regla (menstrual period), kapag hindi kayo nakipagtalik ng isang araw (24 oras), at kapag hindi kayo naglagay ng kahit ano sa inyong vagina, gaya ng foam o gamot ng dalawang araw (48 oras). 

Kailangang magpa-Pap Test ang lahat ng mga babae oras na sila’y nag-umpisang makipagtalik (intercourse) at kailangan nila ituloy ito hanggang sa edad na 70 man lamang. Tumataas ang kapanganiban ng kanser sa cervix habang tumatanda. Kapag higit 50 taong gulang ay kailangan pa rin ng Pap Test : kung nakakaranas kayo ng pagtalik, kahit hindi kayo nakikipagtalik, kahit na nag-menopause na kayo (wala nang pagdurugo mula sa buwanang pagregla), at kahit nagpa-hysterectomy na kayo.

Mga di-pangkaraniwang resulta ng Pap Test

Ang di kasiya-siyang Pap Test ay nangangahulugan na ang mga kawani ng laboratoryo ay hindi nakikita nang mabuti ang mga selula upang sila ay makapagbigay-ulat. Sa ganitong kaso, maaari kayong sabihan na ulitin ang inyong Pap Test.

Ang di-pangkaraniwang resulta ng Pap Test ay nangangahulugan na ilang selula ng matris ay may kaibahan sa ilang paraan sa mga karaniwang selula. Ang mga di-pangkaraniwang kalagayan ay maaring may mababang grado o mataas na grado.

Ang mababang grado ay maliit o di lubhang kalagayan at naglalaho sa kabuuan ng panahon. Karamihan sa mga di-pangkaraniwang kalagayan ay dahil sa impeksiyon ng Human Papilloma Virus (HPV). 4 sa 5 babae ay malalantad sa HPV sa anumang pagkakataon sa kanilang buhay. Ang HPV ay maaaring mapasalin sa pamamagitan ng pakikipag-ugnayang sekswal. Inaalis ng katawan ang buhay na virus sa loob ng isa o dalawang taon. Kapag ang ilang uri ng HPV ay nanatili ng ilang taon, mayroong karagdagang panganib ng kanser ng matris.
Kapag ang resulta ng inulit nang Pap Test ay di-pangkaraniwan, sasabihan kayo ng inyong doktor na sumangguni sa isang espesyalista para kayo ay ma-eksamin sa colposcopy gamit ang instrumentong colposcope na nagbibigay ng isang malaking larawan ng matris upang suriin ang laki at uri ng di-pangkaraniwang kalagayan. Habang kayo ay sumasailalim ng colposcopy, maaaring kunin sa inyong katawan ang isang maliit na sampol ng tisyu (biopsy) at ipapadala sa laboratoryo upang masuri.

Ang mga di-pangkaraniwang kalagayan na may mataas na grado ay mas malubha ang pagbabago sa selula ng matris, na kapag napabayaan at hindi nagamot  ay may mas malaking pagkakataon mauwi sa kanser sa matris na kadalasan ay umaabot ang pag-develop sa loob  ng sampung taon.

Mayroong ilang pagpipiliang pamamaraan ng paggamot batay sa kalubhaan ng di-pangkaraniwang kalagayan. May iba’t ibang paraang ginagamit sa pagtanggal ng mga di-pangkaraniwang selula sa matris, at karamihan nito ay kailangan lamang ng isang araw na pagtigil sa ospital.

ni Loralaine R. (FNA Adviser)

Ang aming inilalathala ay sadyang gabay lamang. Importante pa rin ang pagsadya sa doktor o espesyalista na maari pang magbigay ng iba pang mga tagubilin ayon sa mga pangangailangan ng bawat pasyente. Sila rin ang makakapagbigay-linaw kung mayroon pa kayong mga katanungan o pag-aalala tungkol sa inyong kalusugan.

Ang FNA-Rome ay isang independent, non-commercial, non-profit, non-partisan, non-sectarian volunteer organization. Ang pagkuha ng blood pressure at blood sugar/cholesterol test ay kabilang sa mga serbisyong ibinibigay naming tuwing medical outreach. Kung nais ninyong magpa-schedule ng outreach para sa inyong organization o community, pakitawagan lamang sina Gng. Julia Garzon-Ferrer, FNA Secretary sa numerong 3270885838 at si Bb. Nenette Vecinal, FNA Assistant Secretary, sa numerong 3295371278 para mapag-usapan at mai-schedule ito. Maraming salamat po.         

Last Updated on Friday, 09 December 2011 16:23